Rutas para Colexios

Dende o curso 2003/2004 no campus de Vigo vénse desenvolvendo a través da Oficina de Medio Ambiente o Programa de Educación Ambiental 'Universidade é Natureza'.

Destinatarios

Trátase dunha actividade dirixida aos escolares de Primaria, ESO e Bacharelato de tódolos centros educativos do Concello de Vigo e bisbarra.

A partir do curso 2005/2006 o desenvolvemento do Programa 'Universidade é Natureza' mantense como tal pero integrado no conxunto de visitas didácticas que o Concello de Vigo ofrece baixo o Programa Educativo Municipal 'Vigo por Dentro'. Isto supón unha vantaxe tanto para a actividade en si, polo maior alcance da súa divulgación, como para os centros educativos do Concello de Vigo, que disporán dun servizo de transporte gratuíto ata o campus das Lagoas-Marcosende.

Descrición

O programa emprega, como principal actividade, a realización de dous percursos guiados que atravesan diferentes hábitats propios da nosa rexión, nos que se dan a coñecer a flora autóctona e a fauna que habita no campus, ao mesmo tempo que se tenta concienciar e sensibilizar á xuventude sobre a importancia de respectar e conservar o noso medio.

Aos mestres participantes na actividade proporciónaselles unha carpeta con material de apoio consistente nun CD explicativo dos hábitats, flora e fauna do campus, propostas de avaliación, un exemplar da unidade didáctica do Programa e un exemplar da 'Guía da Natureza do Campus de Vigo'.

Contacta connosco

Se estades interesados en participar no programa poñédevos en contacto connosco.