Auga

O uso da auga na UVigo está destinado principalmente a abastecemento de:

• Aseos e vestiarios
• Comedores e cafeterías
• Laboratorios
• Rega
• Sistemas anti-incendios

A auga potable de subministración a aseos, comedores e laboratorios provén da "auga da traída" fornecida polas contratas municipais. Os sistemas de rega e anti-incendios do campus de Vigo fornécense de auga captada de pozos propios legalizados.

Aforrar auga non só axuda a diminuír os custos da factura deste consumo, tamén é algo positivo pró medio ambiente.

Co aforro de auga conséguese:

• Aforro de custos da súa subministración.
• Redución da enerxía necesaria para tratala, tanto na súa potabilización, como na súa depuración (polo tanto, evítanse tamén a produción de contaminantes consecuencia da necesidade desa enerxía).
• Axúdanos a afrontar mellor as épocas de seca.

Na UVigo véñense desenvolvendo as seguintes accións para mellora-lo estado e aforro da auga:

• Pechar billas cando non se usan e instalar dispositivos de baixo fluxo.
• Revisar que non haxa fugas.
• Recirculala e aproveitala cando sexa posible e ambientalmente non supoña o consumo doutros recursos ou a xeración de contaminantes.
• Minimiza-los residuos que se depositan nela.
• Reduci-lo consumo de carne e produtos da dieta (hábitos alimentarios) que precisen para a súa obtención/elaboración cantidades inxentes de auga.
• Optar por produtos locais e de tempada con menor pegada hídrica na súa produción e transporte.
• Elixir alimentos frescos e pouco procesados, como froitas e verduras, fronte ós enlatados ou conxelados.
• Minimiza-lo desperdicio de alimentos e aproveita-las sobras.
• Reduci-lo consumo de produtos dun só uso que requiren de grandes cantidades de auga na súa elaboración.
• Mercar equipos eficientes en canto ó consumo de auga.
• Prioriza-lo consumo de auga de billa respecto da embotellada.
• Fomentar prácticas de xardinería sostible: captación de auga de chuvia e o uso de plantas nativas resistentes á seca, de menores requisitos hídricos.
• Promove-la reforestación e a restauración de hábitats acuáticos para mellora-la súa saúde.