Residuos orgánicos procedentes de xardinería e de alimentación
Biorresiduo: produto biodegradable desbotado de xardíns e parques, residuos alimenticios e de cociña, procedentes de fogares, restaurantes, servizos de restauración colectiva e establecementos de venda polo miúdo (a retallo), así como residuos comparables procedentes das plantas de procesado de alimentos.
Nos campus, corresponden a residuos producidos principalmente polos restos de roza e poda da Unidade de Xardinería e Paisaxismo da UVigo.
A Unidade de Xardinería recolle os restos de poda e procede á súa trituración. Esta mestúrase cos restos de herba das rozas (campos deportivos e zonas verdes) e utilízase para emendas e como fertilizante de solo naqueles lugares nos que se decide o seu enriquecemento ou restauración. Procúrase que o tratamento para os coidados da herba e do arborado sexa sempre natural, evitando o uso de axentes fitotóxicos e herbicidas.
En relación cos residuos alimentarios (os procedentes de restos de comida), estes corresponden á produción das cafeterías e dos servizos de restauración (comedores) que traballan na universidade e que propiamente non son servizos universitarios, senón servizos adscritos por contrato. Son eses servizos quen se encargan da recollida e xestión dos seus propios residuos. Así, contactan directamente con xestores autorizados para a recollida e xestión do aceite usado das cociñas. Asemade, dispoñen os seu residuos asimilables a domésticos nos colectores de recollida selectiva municipal de rúa (azul para o papel, amarelo para os envases lixeiros e o específico para o vidro ou para os restos orgánicos). Con todo, nalgúns produtos teñen sistemas de devolución e retorno, como é o caso de moitas botellas/recipientes de bebidas, no que os provedores recollen estes recipientes baleiros para a súa reutilización. No caso do campus de Pontevedra, a Deputación colocou expresamente uns colectores para dispoñer restos orgánicos e de comida. Dispoñen de recollida pechada e periódica, e o seu destino é para a produción de compost como fertilizante. No caso do campus de Vigo, a contrata de restauración destina na súa maioría os restos de comida para o propio persoal da súa empresa ou para os veciños das aldeas e vilas da zona (Marcosende e Vilariño), xa que estes os aproveitan para a alimentación dos seus animais.
