Coa construción da actual Facultade de Químicas no campus de Vigo entrou en funcionamento un cuarto destinado á almacenaxe temporal de residuos perigosos producidos por esa facultade (o principal centro produtor de residuos perigosos da Universidade de Vigo).
No campus de Ourense, para almacenar os residuos perigosos producidos nos laboratorios do campus ourensán, está instalada unha cabina de seguridade no almacén xeral do Edificio Politécnico dese campus (Fac. de CC. Ambientais, Enxeñería Agraria e Tecnoloxía dos Alimentos). Ademais, no campus da Auga en Ourense, debido ás necesidades existentes, tamén se construíu un cuarto de almacenamento especial para este tipo de residuos.
A construción do edificio (Olimpia Valencia) que alberga no campus de Vigo as instalacións do novo Cacti (Centro de Apoio Científico-Tecnolóxico á Investigación) e do Cinbio (Centro de Investigacións Biomédicas) dotouse tamén coa instalación dun almacenamento apropiado para reactivos e residuos perigosos.
Ante as necesidades xurdidas co aumento da actividade e do número de laboratorios en funcionamento, tamén se dotaron con almacéns específicos para este tipo de residuos a Facultade de Ciencias do campus das Lagoas-Marcosende, o Cintecx-MTI (Centro de Investigación en Tecnoloxías, Enerxía e Procesos Industriais - Módulo de Tecnoloxía Industrial) no campus da Lagoas-Marcosende, o CIM-Ecimat (Centro de Investigacións Mariñas - Estación de Ciencias Mariñas de Toralla) na Illa de Toralla e o Módulo de Enxeñería Química do Edificio Newton no campus das Lagoas-Marcosende.
Este tipo de cuartos/almacéns están dotados dunha serie de medidas de manexo e seguridade esixidas pola lexislación (MIE-APQ: normas pró almacenamento de produtos químicos), e son recomendables as seguintes:
Afastados de fontes de calor, de tránsito e de traballo.
Con zonas de manobra suficiente para operar e trasladarse (p. ex. transpalets).
Rotulados e identificados de forma clara, indicando: o seu uso, os perigos potenciais (pictogramas de seguridade), as incompatibilidades entre residuos, a situación dos equipos de extinción de incendios, as rutas de escape en caso emerxencia...
Piso firme, nivelado, impermeable e antideslizante.
Paredes e teito impermeable e antihumidade.
Dotado de arquetas, sumidoiros e cubetos estancos antiderrame que eviten fugas ó exterior.
Sistema de ventilación forzada automático-manual, con pas antichispa. Reixas no paramento vertical para ventilación natural.
Illamento ignífugo en paredes, tabiques e teito, así como porta mín. RF-120 e fiestra-visora superior.
Illamento térmico para manter un intervalo seguro de temperaturas; instalar climatización no caso de ser necesaria.
Instalación eléctrica antideflagrante.
Medios automáticos e manuais contra-incendios.
Alarmas e detectores de fumes e escapes/fugas.
Se é o caso, estantes anticorrosivos; non amorear a máis de 2 alturas.
Ducha e lavaollos de emerxencia.
Ademais, no cuarto/almacén deberá disporse o seguinte material de seguridade para utilizar en caso de producirse algunha vertedura/derrame:
absorbente para ácidos
absorbente para álcalis
absorbente para disolventes orgánicos
bolsas de plástico
vasoira e pa
máscaras de protección respiratoria para vapores orgánicos e partículas
gafas oculares integrais
luvas de nitrilo
batas de polipropileno
Para o correcto uso do cuarto de almacenamento de residuos perigosos haberá que cumprir unha serie de normas:
O cuarto permanecerá pechado con chave. Tan só terán acceso ao cuarto os responsables de xestión de residuos perigosos nomeados en cada departamento.
O almacenamento dos envases con residuos perigosos farase ordenadamente respectando as zonas sinalizadas para cada tipoloxía e evitando as incompatibilidades de residuos.
Non mesturar nin diluír residuos. Non mesturar residuos non perigosos cos perigosos (dificulta a súa xestión e encarece as custas).
Previsare a xeración de calor, ignicións e explosións, ou calquera actuación que aumente a perigosidade dos residuos ou dificulte a súa xestión.
Usaranse só recipientes homologados. Serán resistentes, sen defectos nin deformacións e non presentarán fugas nin perdas.
Tódolos envases deben estar correctamente etiquetados de forma clara, lexible e indeleble, indicando a tipoloxía do residuo, o nome do laboratorio/persoa produtora e a data de envasado. Figurarán os pictogramas indicando os riscos e perigos (rombos brancos con bordes vermellos), nunha etiqueta firmemente fixada de dimensións mín. 10x10 cm, anulando calquera outra que poida inducir a erro.
Almacena-los residuos en condicións de hixiene e seguridade (un máximo de 6 meses para residuos perigosos).
Comunicar de inmediato calquera incidencia (desaparición, perda, subtracción, roubo, fuga/escape, derrame/vertedura).
Facilita-las inspeccións e controis.
Non enche-los envases máis dun 90 % para evitar expansións que poidan producir derrames ou explosións.
Esterilizar na medida do posible os residuos bioperigosos.
Nos almacenamentos existe un remanente de recipientes baleiros para que sexan utilizados segundo necesidades.
