Nos campus, das antigas tradicións e usos do mundo rural, herdamos algunhas canalizacións de rega que aínda están en uso en determinadas zonas.

Reciben a denominación de levadas (de auga), e canalizan as augas entre as distintas parcelas e zonas vexetadas que antigamente constituían as comunicacións de rega entre as leiras que conformaban a contorna.

No campus de Vigo podemos atopalas:

• na zona das Abelleiras, onda a Biblioteca Central
• nas Coutadas do Salgueiro, por debaixo da Fac. de Ciencias

Nos campus tamén podemos atopar algún regatos, moitas veces cabeceiras doutros ríos principais da comarca.

Mapa hidrolóxico do campus das Lagoas-Marcosende (Vigo)

Cara á vertente sur, temos dende a esquerda (oeste) o regato Fontecoba, tributario do río Barxa, afluente do río Lagares, que desemboca na praia de Samil de Vigo. No centro e pola dereita (leste), nacentes que van conformar o regato Nespereira, cabeceira dun dos pre-alfuentes do río Zamáns, que á súa vez é afluente do río Miñor que desemboca na Ramallosa. E no norte, está a lagoa de Filoloxía que é o nacente do río Eifonso (que discorre cara ó norte), afluente principal do río Lagares.