No campus sur de Ourense (Bamio) había un pequeno espazo (no que hoxe son as pistas de atlestimo e tenis) que comprendía unha areeira abandonada e os seus arredores máis próximos. Este espazo estendíase nunha superficie aproximada de 7.200 m². Posuía un alto valor ecolóxico, especialmente ao estar incluído dentro dun campus case completamente urbanizado. Os valores máis salientables desta zona eran:

1) Riqueza e singularidade ornitolóxica, aparecendo entre outras especies:

• Cettia cetti, rousinol bravo (invernante e nidificante).
• Riparia riparia, anduriña das barreiras (nidificante).
• Anas platyrhynchos, lavanco (posible nidificante).
• Sylvia melanocephala, papuxa cabecinegra (nidificante).
• Turdus iliacus, tordo rubio (invernante).

2) Riqueza e singularidade florística:

• Vexetación acuática (Typha latifolia, Typha angustifolia, etc.).
• Un exemplar de gran tamaño de piñeiro manso (Pinus pinea).
• Vexetación arbórea e arbustiva: abelairas (Corylus avellana), sebe de estripeiros (Crataegus monogyna), salgueiros (Salix atrocinerea), etc.

3) Variedade de anfibios: pintafontes verde (Triturus marmoratus), sapiño comadrón (Alytes obstetricans), ra verde (Rana perezi), etc.

O feito de que se atopaba nos terreos do campus outorgáballe un enorme potencial educativo e académico (espazo representativo das comunidades de fauna e flora de hábitats de zonas húmidas de auga doce).

Os traballos de recuperación desta zona húmida acometéranse o 5 de xuño de 2001, Día Mundial do Medio Ambiente, cunha recollida de lixo, colocación de carteis de protección e plantación de 5 ameneiros (Alnus glutinosa).

A partir do ano 2005 realizáronse de cheo diversos traballos de protección e restauración desta zona, entre os que destacaron os seguintes:

• Instalación dun valado de protección perimetral da lagoa e da parcela lindeira.
• Roza e limpeza de entullos e lixo.
• Sementeira de herbáceas e plantación de árbores e arbustos: sobreiras (Quercus suber), cerquiños/rebolos (Quercus pyrenaica), carballos (Quercus robur), aciñeiras (Quercus ilex), érbedos (Arbutus unedo), abruñeiros (Prunus spinosa), estripeiros (Crataegus monogyna), lavandas (Lavandula stoechas) e carpazas (Cistus salviifolius)