Instrucións para xestionar Residuos Perigosos (RPs)

As instrucións básicas que haberá que cumprir para unha correcta manipulación e xestión dos residuos perigosos son as seguintes:

• Tratar de minimizar os residuos xerados o máximo posible.
• Doar os reactivos sobrantes antes de que se convertan nun residuo.
• Separar os RPs segundo as diferentes tipoloxías.
• Distinguir e separar "vidro" de "cristal" de laboratorio. Distinguir tamén entre vidro/cristal contaminado do que non o está.
• Non mesturar residuos descoñecidos ou incompatibles. En caso de dúbida envasar os residuos por separado.
• Esterilizar os residuos potencialmente infecciosos antes de envasalos.
• Recolle-los RPs nos envases homologados subministrados pola empresa adxudicataria do servizo de recollida. Está prohibida a utilización de envases non homologados (botellas de auga, frascos de vidro, etc.).
• Para evitar accidentes, etiquetar os envases antes de empezar a utilizalos, empregando para isto as etiquetas homologadas proporcionadas pola empresa adxudicataria do servizo de recollida.
• Encher os envases ata un máximo do 90 % da súa capacidade, para evitar expansións que produzan fugas ou derrames.
• Pechar hermeticamente os envases unha vez cheos, e mantelos limpos e sen deformacións.
• Almacenar temporalmente os envases con RPs en zonas especificas e identificadas, fóra das zonas de tránsito e afastadas de fontes de calor (calefaccións, neveiras, etc.). O máis recomendable é dispor de armarios de seguridade con características axeitadas para os residuos que se van almacenar.
• Na data fixada para a recollida de RPs, un responsable de cada laboratorio entregaralle os envases con RPs á empresa encargada da recollida, coidando de que estean en perfecto estado e correctamente etiquetados.
• Calquera circunstancia non contemplada nestas instrucións pode ser consultada na OMA para tentar darlle a solución máis axeitada.